Löggan sýnir hvernig á að nota samfélagsmiðla

Stefán Eiríksson lögreglustjóri fundaði í dag í utanríkisráðuneytinu með fulltrúum norrænna utanríkisráðuneyta. Stefán fór meðal annars yfir hvernig lögreglan notar samfélagsmiðla til að eiga í samskiptum við almenning en á síðustu misserum hefur embættið hreinlega sýnt hversu öflug tól Facebook, Twitter og Instagram eru séu þau notuð stöðugt og á réttan hátt.

Stefán er að sjálfsögðu á Twitter og tísti um fundinn í dag.

https://twitter.com/logreglustjori/status/473495090636554241

Traust til lögreglunnar hefur aukist um tæp fjögur prósent frá því að Facebook-síða embættisins varð virk í desember árið 2010 skv. Þjóðarpúlsi Capacent. Það er svo sem ekki marktæk hækkun en 83% landsmanna bera mikið traust til lögreglunnar nú og það er erfitt að segja hvort hlutfallið geti hreinlega hækkað. Aðeins Landhelgisgæslan nýtur meira trausts og ekki þarf hún að stöðva partí eða handtaka fólk.

Besta leiðin til að skoða árangurinn sem virkni lögreglunnar á samfélagsmiðlum hefur skilað er að skoða Facebook-síðu embættisins. Lögreglan er dugleg við að leita til almennings eftir aðstoð og undirtektirnar eru undantekningalaust góðar.

Í þessu tilviki var t.d. lýst eftir bíl og á þriðja hundrað manns „tóku þátt“ í leitinni með því að dreifa færslunni:

Þá hefur lögreglan notað húmor í tilsvörum, þvert á samfélagsmiðla, sem skilar sér eflaust í jákvæðara viðhorfi til embættisins.

Allir nota samfélagsmiðla og tækifærin fyrir stofnanir og fyrirtæki eru endalaus. Lögreglan er í mikilvægu þjónustustarfi hjá almenningi og sýnir ákveðna auðmýkt með notkun miðlanna. Auðmýkt sem almenningur kann að meta. Góð samskipti er ekki bara leið til að koma upplýsingum á framfæri heldur gegnsæ leið til að sýna fólki hvað það fær fyrir skattpeningana sína.

Eina sem ég gagnrýni er þetta:

Ekki tengja saman Facebook og Twitter. Þetta er sitthvor miðillinn og virknin er ólík.

Ríkisútvarpið er stöðugt milli tannanna á fólki og hefur ekki fylgt fordæmi lögreglunnar í notkun samfélagsmiðla. Aðeins tæplega 1.600 manns hafa lækað Facebook-síðu RÚV á móti rúmlega 55.000 manns sem læka Lögregluna á höfuðborgarsvæðinu. Nokkrir þættir á RÚV eru þó með fínar Facebook-síður: T.d. Kastljós, fréttastofan og Hraðfréttir. Þrátt fyrir fjölda læka á þessar síður þá er ásýnd stofnunarinnar ekki sterk og samskipti við almenning lítil.

Lögreglan er með tæplega 7.000 fylgjendur á Twitter en RÚV er ekki þar, þó nokkrar deildir innan stofnunarinnar séu á Twitter. Fréttastofa RÚV er t.d. með Twitter-síðu sem birtir sjálfkrafa fyrirsagnir og hlekki í fréttir á ruv.is — eitthvað sem gerir ekkert fyrir notendur síðunnar.

Leiðinlegt var að sjá hversu lítil viðleitni RÚV var til að nota hashtögg til að fóðra umræðuna á Twitter í kosningabaráttunni. Twitter er í mikilli sókn á Íslandi og ég hef áður skrifað um yfirburði miðilsins þegar kemur að opinni umræðu. Besta dæmið um sofandahátt Ríkisútvarpsins var daginn fyrir kjördag þegar oddvitarnar í Reykjavík mættust í beinni útsendingu. Þegar tveggja tíma umræðu lauk var loksins minnst á hashtaggið #kosningar, sem átti að sjálfsögðu að vera í vinstra horni skjásins allan tímann til flokka alla umræðuna á einn stað.

Eflaust má kenna fjárskorti um og þetta horfir til betri vegar skv. Magnúsi Geir Þórðarsyni útvarpsstjóra. Hann hefur boðað stóraukna sókn í vefmálum og nýmiðlun. Við bíðum spennt en peningar eru ekki allt. Stefnan þarf að vera úthugsuð og röddin skýr. Besta dæmið um það er lögreglan, sem syndir ekki í seðlum en stendur sig samt stórkostlega.

P.s. Ég sótti um stöðu nýmiðlastjóra RÚV á dögunum og þetta kann því að hljóma eins og biturt rant. Ég er hins vegar alls ekki bitur og skrifa þetta sem einlægur áhugamaður um notkun samfélagsmiðla.

Auglýsingar

Síðustu orðin um Framsókn í bili

Sveinbjörg Birna Sveinbjörnsdóttir er borgarfulltrúi. Hún vann. Ein Vigdís Hauksdóttir var ekki nóg þannig að Framsóknarflokkurinn sendi okkur aðra. Sveinbjörg er varaþingmaður Vigdísar og ekkert í heiminum meikar jafn mikinn sens.

Eftir að Sveinbjörg lýsti yfir að hún vildi láta afturkalla lóð undir mosku fór af stað atburðarás þar sem orð hennar voru gagnrýnd. Félagar hennar í Framsóknarflokknum, þau Sigrún Magnúsdóttir þingflokksformaður og Gunnar Bragi Sveinsson utanríkisráðherra, virtust t.d. ekki sátt. Formaðurinn Sigmundur Davíð Gunnlaugsson hefur hins vegar reynt að draga athygli frá því sem Sveinbjörg sagði, til dæmis með segja í yfirlýsingu á Facebook að hann vilji ekki blanda sér í umræðu hvort Reykjavíkurborg eigi að gefa trúfélögum ókeypis lóðir eða ekki. Um það snérist málið ekki enda eru allir borgarfulltrúar sammála um að þau lög beri að endurskoða.

Þá hefur hann lagt áherslu á gagnrýni á staðsetningu moskunnar:

Ég fær­ist nær því að þetta sé ekki heppi­leg staðsetn­ing held­ur ætti áfram að vera grænt svæði.

Á vef Reykjavíkur eru græn svæði skilgreind svona:

Sum búa yfir fjölskrúðugri upprunalegri náttúru en önnur hafa verið endurmótuð eða hönnuð frá grunni t.d. með garðyrkju, skógrækt og byggingu mannvirkja. Sum svæði bjóða upp á sérstaka þjónustu t.d. íþróttaaðstöðu, fræðslu um náttúru eða sögu, fiskveiðar og margt fleira.

Ég hef allavega aldrei séð neinn spila frisbí-golf þarna á blettinum við hliðina á Miklubraut, fjölförnustu umferðaræðarinnar í Reykjavík, þar sem til stendur að reisa moskuna. En ég keyri svo sem ekki framhjá á hverjum degi.

Málflutningur Sveinbjargar í aðdraganda kosninganna einkenndist af innistæðulausum og fordómafullum upphrópunum, sem flestar voru hraktar. Það eru kirkjur í Abú Dabí og moskur í Lúxemborg. Þvert á það sem hún hélt fram.

Í Stóru málunum, umræðuþætti Stöðvar 2, kvöldið fyrir kjördag spurði Sveinbjörg hvort Íslendingar vildu búa í samfélagi eins og Svíþjóð. Þar væri nýbúið að samþykkja lög sem gera refsivert að þvinga fólk í hjónaband. Þetta sagði hún til að undirstrika þá skoðun að afturkalla ætti lóð undir mosku í Reykjavík.

Í fyrsta lagi: Já, takk. Ég er mjög fylgjandi því að íslenskt samfélag verði líkara því sænska. Ekki bara samfélagið heldur landið sjálft, veðrið, árangur í íþróttum, viðhorf til skapandi greina, framleiðsla o.s.frv.

En Sveinbjörg er lögmaður sem gaf orðum hennar óneitanlega vigt. Til að verða lögmaður þarf maður að fara í háskóla í mörg ár og lögmenn gera meira af því en t.d. framhaldsskólakennarar og sálfræðingar að lesa lög. Ef Sveinbjörg hefði kynnt sér hjúskaparlögin myndi hún vita að það er þegar bannað að þvinga fólk í hjónaband á Íslandi:

Hjúskaparlög

Annað hjóna getur krafist ógildar hjúskapar síns hafi það verið neytt til vígslunnar. Þetta verður ekki mikið skýrara.

Ég er alveg að vera búinn að sætta mig við þetta. Framsókn er ein af sigurvegurum kosninganna en hver tapaði? Jú, auðvitað Jón Gnarr …

Samkvæmt Hönnu Birnu Kristjánsdóttur innanríkisráðherra eru kosningarnar ekki áfall fyrir Sjálfstæðisflokkinn, sem er með um 18% minna fylgi nú en í síðustu kosningum eftir fjögur í minnihluta. Ekki heldur fyrir frambjóðendur Bjartrar framtíðar sem náðu talsvert lakari árangri í kosningunum en þeir máttu búast við m.v. kannanir. Nei, kosningarnar eru áfall fyrir Jón Gnarr að mati Hönnu Birnu sem lét hafa eftirfarandi eftir sér í umræðuþættinum Eyjunni á Stöð 2:

Meiri­hlut­inn féll og niðurstaðan hlýt­ur að vera mikið áfall fyr­ir sitj­andi borg­ar­stjóra, sem menn hafa skil­greint sem vin­sæl­asta borg­ar­stjóra allra tíma, þrátt fyr­ir að hann sé sá borg­ar­stjóri sem hef­ur notið hvað minnst trausts flestra borg­ar­stjóra.

Gott að hún nefnir þetta með traustið. Jón Gnarr skilur við borgina í þriðja sæti á lista MMR yfir traust til stjórnmálaleiðtoga. Tæplega 40% þjóðarinnar bera til hans mjög mikið traust. Aðeins Katrín Jakobsdóttir og Ólafur Ragnar Grímsson eru fyrir ofan Jón. Sama könnun sýndi tæplega 27% traust þjóðarinnar til Hönnu Birnu sem innanríkisráðherra.

Í öllu falli er forvitnilegt kjörtímabil framundan. En nú skiptum við yfir á apa á hjóli:

Road_safety_Orangutan_rides_bike

Topp 5: Kaupmátturinn og dýrðin

1. Lúxusbílar
Sala á lúxusbílum virðist vera að taka við sér skv. tölum Samgöngustofu en bara í maí hafa Íslendingar keypt tvo Tesla rafbíla, tvo Porsche, þrjá Lexus og sjö BMW lúxuskerrur og hvorki fleiri né færri en 31 Benz eðalvagn. Verðið á bílunum er frá tíu og upp í tuttugu milljónir en það fer að sjálfsögðu eftir hversu vel bílarnir eru búnir.

2. Flatskjáir
Elko opnaði nýlega endurbætta verslun í Skeifunni. Í auglýsingunni fyrir opnunina kemur sérstaklega fram að sjónvarpsdeildin hafi verið stækkuð. Það bendir til þess að verslunin sé að mæta eftirspurn og að salan hafi aukist.

3. Tónleikar
Erlendir tónlistarmenn streyma til landsins. Justin Timberlake er á leiðinni, rétt eins og plötusnúðurinn David Guetta og gamla fólkið í Pixies. Þá laðar tónlistarhátíðin All Tomorrows Parties til sín New York-sveitirnar Interpol og Portishead ásamt kanadísku goðsögninni Neil Young. Einhverjir miðar þurfa að seljast svo þessir tónleikar beri sig en sem dæmi um áhuga almennings þá seldust 16 þúsund miðar á tónleika Justin Timberlake á mettíma.

4. Kampavín
Sala á kampavíni hefur aukist um 17% á fyrstu fjórum mánuðum ársins samanborið við sama tímabil í fyrra. Þetta kom fram á dögunum í Markaðspunktum greiningardeildar Arion banka. Kampa­vínssala dróst sam­an um 70% á árunum 2007 til 2010 en virðist nú vera að taka við sér.

5. Raunveruleikaþættir
Idolið, Bachelorinn, Ástarfleyið, X-Factor og fleiri raunveruleikaþættir voru framleiddir eftir erlendum fyrirmyndum á árunum 2003 til 2008. Upp á síðkastið höfum við fengið að sjá Vertu viss, íslenskan Master Chef, Ísland Got Talend og Biggest Loser Ísland en síðastnefndu þættirnir fá framhaldslíf í haust. Loks er væntanleg íslensk útgáfa af þættinum Minute to Win It.

Talað við ókunnuga

Átta af hverjum tíu Íslendingum eru á Facebook. Þrátt fyrir þetta ótrúlega hlutfall erum við eftirbátar margra þjóða þegar kemur að því að nýta samskiptamiðlana til fulls. Facebook hefur fjölmarga samfélagslega kosti en sem tól til að tengja saman ólíka hópa og skoðanir er það glatað.

Vinir og kunningjar eiga samskipti á Facebook, sem síar út þá sem þú átt í litlum samskiptum við. Ef þú lækar status hjá vini þínum eykurðu líkurnar á því að þú sjáir næsta status frá honum. Þannig gerist það smátt og smátt að veggurinn þinn fyllist af fólki sem þú átt samleið með. Umræðan lokast því inni í ákveðnum hópum og sleppur ekki út nema í undantekningartilfellum. Hvað getum við gert í þessu?

Við byrjum að nota Twitter. Twitter er eins og frjálslynd útgáfa af Facebook — umræða án hindrana í formi vinabeiðna og einkalífsstillinga. Twitter flokkar umræðuna í kassamerki (e. hashtags) og virkar best þegar sérstakir viðburðir eru í gangi. Fótboltaáhugamenn (#fotbolti) voru fyrstu íslensku landnemarnir á Twitter en í dag er hópurinn sem notar samfélagsmiðilinn mjög fjölbreyttur og sístækkandi. Gísli Marteinn (#sunnudagur) og Mikael Torfason (#minskodun) nýta sér til dæmis Twitter til að víkka út umræðuþætti sína á netið með frábærum árangri, Eurovision verður helmingi skemmtilegra (#12stig), eins og Óskarsverðlaunin (#óskarinn) og 25 ára afmæli bjórsins á Íslandi (#bjór25) varð allt í einu persónulegt þegar Íslendingar lýstu fyrstu kynnum sínum af þeim görótta drykk í 140 slögum.

Twitter-byltingin er hafin og fjölmiðlar þurfa að vera vakandi með því að birta kassamerki með beinum útsendingum. Viðw sjáum nefnilega reglulega glötuð tækifæri til að færa umræðuna á annað stig. Fyrstu oddvitakappræðurnar í Reykjavík fóru fram á Stöð 2 á mánudag en kassamerkið í horninu var fjarverandi. Umræðan var því lítil. Kastljós gerði sömu mistök þegar forsætisráðherra settist í rafmagnsstólinn hjá Helga Seljan á þriðjudagskvöld.

Börnum er sagt að tala ekki við ókunnuga en þegar maður verður fullorðinn er það skemmtilegt, gefandi og nauðsynlegt til að víkka sjóndeildarhringinn. Gerum meira af því. Sjáumst á Twitter (@atlifannar).

Stjörnurnar í útlöndum

Harmdauði leikarans Philips Seymour Hoffman minnti mig á hræðileg örlög söngvarans Layne Staley. Hann lést árið 2002 eftir að hafa dópað frá sér flest, þar á meðal farsælan tónlistarferil með hljómsveitinni Alice in Chains. Staley kvaddi þennan heim umkringdur krakkpípum og kókaíni en enginn kvaddi hann. Hann var algjörlega afskiptur þegar hann lést. 39 kílóa brunarúst sem fannst eftir að gjaldkeri lét vita að ekki hafði verið hreyft við bankareikningi hans í viku.

Og ekki var mikil reisn yfir Hoffman. Hann fannst heima hjá sér í stuttbuxum og nærbol með gleraugun á nefinu. Kaldhæðnislega eins og önnur hver persóna sem hann lék hefði stimplað sig út. Talið er að of stór skammtur hafi drepið hann — enda umkringdur heróíni og lyfseðilsskyldum lyfjum þegar hann fannst. Hoffman hafði talað opinskátt um fíkn sína og viðurkennt að vera sjúkur í allt sem var hægt að skrapa saman með kreditkorti.

Við þekkjum stjörnurnar í útlöndum ekki persónulega þrátt fyrir að hafa eytt með þeim meiri tíma en meðal ættingja. Okkur stendur samt ekki á sama þegar þær deyja. Ekki frekar en þegar við lesum sömu hræðilegu fréttir af fólki sem við getum flett upp í Íslendingabók. Útbreiðsla þessara frétta minnir okkur stöðugt á að við erum að glíma við risavaxið vandamál á löngu úreltum forsendum stríðs sem er tapað.

Árið er 2014 og stórkostlegar tækninýjungar líta dagsins ljós á næstu misserum. Líffæri verða þrívíddarprentuð og grædd í fólk (!), fleiri rafmagnsbílar verða framleiddir en nokkru sinni fyrr og flugvélar netvæðast á ógnarhraða. Það er samt skekkja. Við uppfærum símana okkar árlega en horfum í hina áttina á meðan gamaldags lagasetning dælir fíklum í fangelsi fyrir að vera fíklar, gerir fangaverði að meðferðarfulltrúum og leyfir heilbrigðiskerfinu ekki að gera það sem það gerir best: Að lækna veikt fólk.

Víbrandi afturendi Miley Cyrus

Það sem gerðist í Smáralind síðdegis sunnudaginn fimmta janúar var yfirlýsing. Unga fólkið var að segja okkur sem hlustuðum á Ladda á vínyl og drukkum Ískóla að byltingin sé handan við hornið og að hún verði fönguð á sex sekúndna myndband á Vine-síðu Jerome Jarre.

Byltingin verður ekki blóðug. Við þurfum ekki einu sinni að kalla hana byltingu. Kynslóðaskipti er nær lagi og þau eru óumflýjanleg. Það sem gerir væntanleg kynslóðaskipti merkilegri en þau síðustu er að nú mætir á svæðið kynslóð sem er tilbúin að byrja upp á nýtt. Til fjandans með pappírsmiðla, línulega sjónvarpsdagskrá og Spaugstofuna — þau vilja nýtt upphaf. Þau nenna ekki einu sinni að nota Facebook vegna þess að ég og hinir steingervingarnir erum þar að rífast um nasisma.

Þessi kynslóð hefur aldrei heyrt um dagblöð. Hún veit ekki einu sinni að það er hægt að nota pappír annars staðar en klofvega á klósetti. Hún skoðar ekki hefðbundna fréttamiðla — fjandinn hafi það, hún hefur ekki lesið neitt sem er lengra en 140 slaga tíst á Twitter. Þessi tiltekna bylting borðar ekki börn — hún er gerð af börnum sem hugsa á svo miklu róttækari hátt en kynslóðin þar á undan, sem trúir enn að gamaldags draslið sem hún notar sé ómissandi.

Sem dæmi um kraftinn sem leysist úr læðingi við kynslóðaskiptin þá tók Vine-stjörnurnar tvær aðeins sex sekúndur að troða fleiri ungmennum inn í Smáralind en jólin og janúarútsölurnar til samans. Þessar sex sekúndur höfðuðu betur til framtíðarneytenda þjóðarinnar en allar heilsíðuauglýsingar síðasta árs. Þessir strákar búa yfir meiri mætti en rúmast í öllum fjárhagsáætlunum sem hafa verið settar saman á Íslandi síðasta áratuginn.

Við sem fæddumst á síðustu öld þurfum samt ekki að leggja niður störf. Við eigum eflaust nokkur góð ár eftir sem við getum nýtt í að rífast á Facebook, hamstra magnesíum og góna á víbrandi afturenda Miley Cyrus, eins og risaeðlurnar sem störðu vanmáttugar á loftsteininn sem tortímdi þeim.

Völva 2014 – III. hluti

Síðasti hluti þríleiksins.

1. Facebook byrjar að rukka fyrir síður eftir lækmagni. Maggi Mix lýsir sig í kjölfarið gjaldþrota.

2. Crossfit verður fjölbreyttara. Á meðal nýrra keppnisgreina eru opnun krukka, kommóðuburður, vítaskot í körfu og tenging AppleTV.

3. 47 af 52 þeirra sem hreppa stóra vinninginn í lottóinu verða Norðmenn. Enginn þeirra kaupir jóker.

4. Jim Gaffigan hættir við komu sína til Íslands þegar hann kemst að því að McDonalds hefur yfirgefið landið.

5. Vísindamenn komast að því sem marga hefur grunað: KFC er það besta sem fólk getur látið ofan í sig eftir æfingu.

6. Listi yfir pók fólks á Facebook lekur og í kjölfarið verður skilnaðarlögfræði hin nýja þrotabúalögfræði.

7. Steindi Jr. verður bæjarstjóri Mosfellsbæjar. Fyrsta embættisverk hans verður að breyta nafni bæjarins í Pizzabær.

8. Rannsókn leiðir í ljós að bakteríumagn á umbúðum sótthreinsandi gels sé meira en ofan í almenningsklósettum skemmtistaða.

9. Enn gefur Sigmundur Davíð lítið fyrir skammstafanir þegar hann er spurður um gott gengi OKC í NBA.

10. Frjálslyndi Frans páfa nær nýjum hæðum þegar hann fær sér pylsu á föstudegi.

Allt á Twitter: #völva2014

Ef verðlaun væru marktæk

Allir vita að það er undarlegt að veita verðlaun fyrir árangur þar sem mælieiningin er huglæg. Þess vegna gerir það enginn. Helstu verðlaunahátíðir heims veita nokkurs konar söluverðlaun enda ógjörningur að mæla með óyggjandi hætti hvaða plata eða kvikmynd er best. Gæði eru mæld á fjölbreyttan hátt en lokaniðurstaðan ræðst ávallt af huglægu mati fólks, sem stjórnast af ótal tilfinningum.

Nú þegar tilnefningar til íslensku tónlistarverðlaunanna hafa verið kunngjörðar fer af stað sama umræða og í fyrra. Og árið þar áður. Sumum líst ekkert á listann og efast í kjölfarið um dómgreind dómnefndar. Fullt af frábærum plötum er hvergi að finna á sama tíma og fullt af leiðinlegum plötum eru tilnefndar í fullt af flokkum. Fullkomlega rökrétt umræða… ef það væri til tónlistarlegt metrakerfi, mælt með tónlistarlegu málbandi sem dómnefndir kynnu almennt ekki að lesa á.

Málið er að verðlaunahátíðir eru ekki haldnar af örlátu hugsjónafólki. Þær eru haldnar til að hampa þeim sem þjóna best hagsmunum þeirra sem veita viðurkenninguna. Þess vegna er ekkert skrýtið að Beyoncé fái stærstu verðlaunin fyrir plöturnar sínar en ekki Will Oldham. Hún selur miklu fleiri plötur og uppskeran er ekki aðeins stjarnfræðileg auðævi, milljónir aðdáenda og spikfeitur trúlofunarhringur frá Jay-Z, hún hefur líka unnið 17 Grammy-verðlaun, 24 Billboard-verðlaun, tvenn Brit-verðlaun og 9 BET-verðlaun frá því að hún gaf út fyrstu sólóplötuna sína árið 2003. Hún hefur meira að segja verið tilnefnd til Golden Globe-verðlauna fyrir kvikmyndaleik.

Upphefðin kitlar eflaust hégómagirnd Beyoncé en auðvitað skipta verðlaun engu raunverulegu máli. Ef verðlaun væru marktæk væri til dæmis Shakespeare in Love besta myndin sem kom út árið 1998 og Beautiful Day með U2 besta lagið sem kom út árið 2000. Þeir, sem finnst það eðlilegt, þurfa á hjálp að halda. Þá væri Maroon 5 besta hljómsveitin sem steig fram á sjónarsviðið árið 2004 og Fearless með Taylor Swift besta platan sem kom út árið 2008. Loks væri Cuba Gooding Jr. betri leikari en James Woods, Edward Norton og William Macy, Coolio á meðal bestu rappara sinnar kynslóðar og forseti Bandaríkjanna væri friðarsinni.

Völva 2014 – II. hluti

Hvað gerist á nýju ári?

1. Tölvukerfi Dominos verður hakkað og vandræðalegum smsum frá fyrirtækinu til viðskiptavina lekið.

2. Ravbílavæðingin heldur áfram þegar Toyota kynnir nýjan og endurbættan Rav 4.

3. Eftir að Harpan birtir uppgjör ársins 2013 kvartar einhver.

4. Baltasar Kormákur hefur framleiðslu á framhaldi hasarmyndarinnar 2 Guns. Vinnutitillinn verður: 2 Guns 2: 2 cool 4 school.

5. Manchester United fer vel af stað á Englandi og vinnur þrjá fyrstu leiki sína gegn Millwall, Watford og Barnsley.

6. Eftir að Ísland vinnur Eurovision kemur í ljós að keppnin verður ekki í Hörpu, sem er bókuð undir ráðstefnu félags hundarúnkara.

7. Sjálfkeyrandi bíll kemur á markað. Hann er fljótlega gagnrýndur fyrir að rúnta of hægt niður Laugaveginn og gefa ekki stefnuljós.

8. Miley Cyrus slasast illa í hræðilegu twerk-slysi. Læknar óttast að hún muni aldrei twerka aftur.

9. Greiningardeildir bankanna spá því að innflutningur á kókaíni aukist og verði svipaður og árið 2005.

10. Í kjölfarið á banni við trúboði í grunnskólum Reykjavíkur verður nemendum Háskóla Íslands bannað að taka trúboðann.

Meira á Twitter: @atlifannar 

Völva 2014 – I. hluti

Topp 10 viðburðir árið 2014.

1. Kommentakerfi DV verður lagt niður og landsmönnum býðst að senda hver öðrum kaldar kveðjur með drónum.

2. Megrunarkúrinn: „Éttu skít“ verður kynntur til sögunnar og hampað af helstu sérfræðingum á sviði næringarfræða.

3. Fyrsti rafbíllinn á Íslandi verður rafmagnslaus á Sæbraut. Þegar eigandinn hringir eftir aðstoð verður síminn hans batteríslaus.

4. Hugmyndir um ríkjasamstarf við Grænland eru slegnar af borðinu þegar það kemur í ljós að grasið er ekki grænna þar.

5. Íslensku klukkunni verður ekki breytt í takt við gang sólar, enda í mikilvægu sinki við klukkuna á Klörubar á Kanaríeyjum.

6. Áhugi á lífrænum matvælum hrynur í kjölfarið á því að mynd af þriggja daga gömlum lífrænum banana fer í dreifingu á netinu.

7. Flóttamanni er vísað úr landi vegna þess að hann gleymir ítrekað að bjóða góðan daginn.

8. RÚV opnar veðmálasíðu á textavarpinu.

9. Í örvæntingarfullri leit af fjármagni byrjar Landspítalinn með eigin útgáfu af „Vertu viss“ þar sem líffæri eru gjaldmiðillinn.

10. Ökukennarinn Gylfi Sigurðsson semur við þýska úrvalsdeildarliðið Bayern Munchen – misskilningur sem kostar liðið 13 milljarða.

Meira á Twitter: @atlifannar

%d bloggurum líkar þetta: